絲絲平時都會聽吓音樂，西洋古典音樂、中樂、民歌、重金屬、流行曲等等，總之覺得啱聽就會聽，最重要係可以輕鬆一下，絲絲八卦到新世界發展（00017）主席鄭家純（Henry），間唔中都會喺自己辦公室聽吓音樂，減吓壓，你哋估吓佢嘅Favourite係乜？原來係懷舊歌曲（Oldies），例如木匠樂隊（Carpenters）。
Henry公事繁重，喺自己辦公室聽吓音樂減壓一啲都唔奇，可以令腦筋清醒，做事更加醒神，所以佢辦公室裝咗幾對望落好低調嘅靚喇叭。絲絲好有興趣知道佢聽乜嘢音樂多啲，會唔會係西洋古典音樂？原來佢比較鍾意聽懷舊歌曲，Carpenters就係其中之一，絲絲即刻諗起《Yesterday Once More》、《Top of the World》、《Jambalaya》。
有個老友最近去過佢嘅辦公室，大讚亨利個辦公室好樸實，除咗幾對喇叭引人注目外，就係同老竇鄭裕彤、仔仔鄭志剛等的照片，仲有一啲陶瓷、名畫等藝術品，最特別就係有個大魚缸。咦！咁如果播住音樂，咪好似「魚樂無窮」囉。
余詩韻