金融徐筆：國泰君安受惠政策
長假期返嚟，雖然個市依然有放假氣氛，大家都仲團拜緊、開緊年，不過蛇年炒股唔炒市。Prof.J一於嚟個蛇年雙響炮，品題國泰君安（01788）以及冠捷科技（00903），賀一賀佢，祝大家蛇年股運亨通！
國泰君安作為首批嚟香港插旗嘅內地券商，對於中央推出嘅政策係會明顯受惠。譬如之前批出RQFII，因為好多獲批嘅券商都未有香港牌，國泰君安等就率先享受咗頭啖湯。而「B轉H」計劃對內地券商股亦十分有利，因為可帶動呢項新業務嘅收入。再加上今年仲有背景相似嘅大型內地券商準備AH股上市，國泰君安亦具有影子概念。
冠捷仍有增長空間
冠捷亦受惠國策，新一輪節能補貼政策已經推出。主打液晶體LCD電視嘅冠捷亦可以獲得補貼。粗略統計，一般國家扶持政策都歷時三至五年先淡出。雖然今次補貼話只有一年，但由於內地人生活改善咗，大嘅LCD電視需求仍有增長空間。
兩隻股嘅平均線都係呈擴張姿態，之前講過20日線成為冠捷嘅空中鋼線，股價仲有機會get set go！心急嘅，就睇10日線出擊；有耐性、怕死嘅，就20日線紮馬。至於國泰君安，股價仲處於第一個升浪中，暫時未見有明顯回吐，不過高位成交量唔算多，先睇下4元位夠唔夠支持力。繼續追蹤，出發！
香港大學電子金融服務榮譽助理教授 徐燦傑