美國嘅量寬玩到幾時，好睇經濟數據復原速度。尋日法國手袋品牌Longchamp公布舊年銷售額錄得16%增長，其中美洲地區銷售跑贏全世界，莫非美國經濟真係復甦當中？如果其他名牌都咁好景，真係復甦嘅好徵兆。
Longchamp舊年銷售總額達到4.54億歐羅，相等於45.4億港元，當中美洲銷售按年增26%，仲叻過增長超快嘅亞太地區，呢區嘅增幅係25%，至於發源地法國就有9%增長，歐洲就有16%。
以市場份額計，就梗係老家法國最大，排第二嘅就係美國。Longchamp行政總裁尚‧卡士格蘭（Jean Cassegrain）就話，歐洲經過舊年艱辛嘅十二月之後，今年頭兩個月銷售不俗，有信心今年可以承接上年雙位數嘅增長，仲好沙塵咁話，咁就證明公司比其他同業抗跌力強！
其實歐洲表現咁強，唔多唔少同內地客有關，皆因好多內地客喺當地直接入貨，買嘅都係最新款；而公司今年亦即將喺倫敦攝政街開新店，可見亞洲同歐洲市場都係佢哋穩健增長嘅來源。
絲絲亦見過唔少內地客喺香港「豪買」，每隻色都要一個好常見，所以真係唔可以睇小亞太區嘅銷售，話唔定今年仲會超越美洲地區，成為銷售No.1嘅地區添！
余詩韻