Market Insight：華潤燃氣蓄勢爆升

近半年，香港奢侈品零售商生意放緩，查實已隱約帶出，內地消費唔多理想的趨勢，內地公布春節黃金周零售餐飲銷售額5,390億元人民幣，按年升14.7%。同香港睇慣單位數零售增長，比較起來以為好勁，但實際係內地同期的四年新低。

大行預期三月習近平接任後，反貪腐將進入高潮，零售增長仲有進一步放緩空間，尋日金鷹商貿（03308）、銀泰百貨（01833）跌幅分別達3.1及3.6%，反之走大眾化路線，經營大潤發特賣場的高鑫零售（06808）逆市升0.9%。短期內，白酒股、濠賭股外，睇嚟百貨股都應該暫避其鋒，尤其官場一直盛行以百貨公司預付卡去送禮，唔知中央政府幾時會出手堵截，而且對比去年業績表現，幾隻百貨股估值實在亦有點過高之嫌。

放大圖片

放大圖片

房託基金可翻兜

一月初港股急升後，二三線股唔少只得一陣虛火，抽升兩日後便吽吽哋。反而去年十二月因基金risk on，齊齊沽防守股而慘被質低的房託基金，矮仔上樓梯，部分已重返高位，好似龍頭領匯（00823）由谷底37.9元，到尋日全日最高位42.9元收市，距離歷史高位43.1元，只是一步之遙。

特區政府唔畀人炒樓，推出SSD 2.0及BSD兩大辣招，美國超低息期唔知仲要維持幾耐，日本仔又加入印銀紙行列，領匯有3至4厘回報，其實已足夠吸引唔少要穩陣交數的低風險資產管理人，這總勝過以唔到2厘回報，買完全不能在資產泡沫中受惠的美國債券。

另一房託基金陽光房產（00435），尋日公布中期可分派收入1.496億元，微升2%，每單位派8.5仙，每基金單位淨值則升9.8%，至6.17元，尋日收市價3.54元，估計下半年可供分派收入持平，息率約4.8厘，比領匯的3.6厘高，但後者未來兩三年分派年增長估計有11至14%，好息之徒，不妨自行取捨。

近半年升勢最平穩的要數燃氣股，上月底發過超着數零息債券，以極低廉價錢取得新融資的新奧能源（02688），上星期股價見過40.5元上市新高，差不多等於一三年19倍PE，絕對唔平，奈何國策傾斜支持下，未來幾年管道燃氣坐定粒六保持高增長，基金大戶貴一貴都要買。

批股消息已消化

今浪仲未破頂的要數華潤燃氣（01193），主要係去年十一月，潤燃在水頭充足下，突然大折讓批股，殺大孖沙一個措手不及，最後足足花近三個月時間消化沽壓，期間仲一度潛水跌到落15.7元，比批股價16.95元低7.4%。

經驗話畀我哋知，股市炒家唔單止見錢眼開，仲係極為善忘，近期潤燃股價已重整旗鼓，返到批股價樓上。查實去年十一月，潤燃已獲商務部批准在天津成立合資公司，伸手唔係無的放矢，幾隻較具規模的燃氣股之中，又以潤燃未來兩三年預期增幅最大。鑑於短期有開車迹象，若然手上有中國燃氣（00384）或新奧的話，不妨諗諗酌量換貨，估計短期潤燃上升潛力相對較高。

淡靜市買當頭起

論尋日的熱炒板塊，非照明股莫屬，真明麗（01868）、達進東方照明（00515）、雷士照明（02222）升幅介乎7.9至15%，交投活躍，反而上周五異動的建材股同前海概念股就抖緊氣。看來指數偏軟，交投仍然偏靜之下，仍留喺魚缸嘅炒作資金繼續玩碰碰車，游走於不同板塊。

呢啲市有智慧不如趁勢，每朝早瞪大眼睇下邊個板塊異動就小注跟進走即日鮮，咁輸贏都會有個譜！

古勝