以往農曆新年前後，內地聚餐同年會宴請進行得如火如荼，可以話係高檔餐廳同貴價白酒銷售嘅黃金檔期，之但係新領導人上場後，近排內地官場力倡勤儉節約，吃喝送禮活動大減，搞到全國有近六成嘅餐廳畀啲客退訂。
而且，仲要愈係高檔愈係退得多，好似佛跳牆、高檔酒呢啲貴價產品銷量更加直線下跌，唔怪得相關股份嘅股價「跌跌不休」，睇怕高檔餐飲企業同白酒生產商今年年關難過。
中央力倡「厲行勤儉節約、反對鋪張浪費」搞到官商界文化大變，中國烹飪協會最近發表嘅報告透露，有六成餐飲企業近排出現退訂潮，好似北京一間五星級酒店就因為有客退訂要少收近千萬人仔，天津餐飲企業接到嘅公務宴請單，唔單止數量比舊年跌咗三成，消費標準都跌剩往年嘅一半。
啲貴價白酒更加受「重傷」，近期中央宣揚唔飲酒嘅新文化，搞到胡潤百富編製嘅中國受歡迎禮品排行榜上，茅台酒由舊年嘅第五名跌至十甲不入，公司股價由舊年十一月到依家，已經唔見咗兩成半。近排高檔酒水消費量係咁插水，睇怕就算踏入蛇年，都仲要跌多排。
余詩韻