絲絲講場：股神阿仔終身獻巴郡

股神巴菲特接班人估咗幾年，最終喺前年確定由佢阿仔霍華德接手巴郡，最近霍華德接受彭博訪問，講明自己已經準備好將下半生奉獻畀巴郡，股神聽見真係老懷安慰！之但係阿仔就話為咗傳承巴郡嘅文化，要放棄做輔警編制中副警長一職，無得再拎住支炮行咇，話身份不夾喎！

今年五十有八嘅霍華德，雖然只係喺伊利諾伊州務農，同埋積極拓展有關嘅慈善業務，好似同投資界格格不入，但佢其實已經喺巴郡董事局做咗廿年董事，對公司運作可謂瞭如指掌，一○年更加入可口可樂董事局。

佢話多年嚟睇住爸爸工作，深信自己已經裝備好統領董事局，「我一生都喺度準備緊！我會守護公司嘅文化，所有父親承諾過嘅事都會延續落去，確保每位員工都感到公平。」

絲絲記得巴菲特曾話過希望接班人能夠守護公司嘅價值，避免有人利用巴郡謀私利，如今霍華德公開話為公司押上一輩子，巴菲特真係可以放心啦！

余詩韻