金融徐筆：中石化配股惹遐想
龍年最後由中石化（00386）成功標尾會，以私人配售方式，折讓9.5%，定價8.45元向10名股東集資近240億元。今次配售超過28億股H股股份，集資所得將用作一般營運資金。Prof. J覺得出奇嘅地方並唔係中石化配股，而係折讓幅度以藍籌股嚟講算係相當大。
市場估中石化今次配股嘅目的係準備收購母公司嘅海外上游資產，而配股後集團今年嘅負債比率會由48%降至43%，係好事，不過，配股亦產生攤薄效應，所以Prof. J相信即使有新收購項目，對提升盈利方面嘅貢獻亦都只係有限公司。
部分指數基金要增持
中石化今次配股佔已發行H股數目高達17%，同一般授權上限嘅兩成只係差3%，可以話差唔多配到盡。都明白嘅，機會只得一次，因為今次配售嘅股份有180日禁售期，而集團同期亦唔可以再透過H股集資。以往集團多數係發可換股票據（CB）嚟集資，不過今次就改變咗融資策略，以直接方式集資。呢個改變令Prof. J有啲遐想，因為如果大市升緊，通過CB集資係十分理想嘅途徑，兼且反映公司睇好大市前景；不過若果跌市的話，CB持有人就可能因為未能行使而損手。
講番配股後嘅中石化，佢喺各個指數譬如國企、恒生、MSCI中國、富時中國等嘅比重將會提高，令到啲被動指數追蹤基金要追買等值嘅中石化股份，對股價有一定支持。加上集團嘅煉油業務已由虧轉盈，相信佢嘅化工業務亦正在復甦。短線以8.45元做支持位，繼續追蹤，出發！
香港大學電子金融服務榮譽助理教授 徐燦傑