全球五大智能手機供應商之一嘅中興（00763）成立至今三十載，佢哋管理層對公司嘅歷史文化發迹相當重視，喺深圳總部專登開咗間中興歷史檔案館，絲絲早幾日去參觀過，得知幾位「阿總」侯為貴、史立榮等嘅逸事趣聞。
董事長侯為貴同時亦係公司嘅創辦人，有張八十年代嘅合照，就見到「侯總」同幾位partner研究緊公司喺蛇口邊度選址，點知佢作為最緊要嗰位，竟然唔望鏡頭，絲絲都只係由佢側面同身形勉強認得出係佢。仲有「侯總」原來早就下定決心要向歐美科技巨擘學習，館內展示出佢建議嘅員工閱讀書單，羅列咗《惠普（HP）之道》、《微軟的秘密》、《我看英特爾（Intel）》等名作，時易世易，唔知「侯總」呢一兩年會唔會加入喬布斯自傳、三星成功的啟示呢類新書呢？
另外，現任執行副總裁兼財務總監韋在勝八八年加入中興時，財務部只係喺一間只有幾張木枱木櫈嘅細房開工，佢帶領呢個部門，數數埋埋至得三個人，你話唔一腳踢就假。
現任中興總裁史立榮強項係喺國際市場開疆拓土，九十年代時佢就曾經單槍匹馬遠赴瑞士日內瓦參加電訊展，相信在場唔少歐洲同行，都估唔到呢位坐喺reception嘅西裝哥哥，原來係當時公司副總經理。公司職員知道佢哋親力親為嘅事迹，對公司自然更有歸屬感啦！