諾基亞（Nokia）手機市場昔日嘅霸主地位，早已因iPhone及Android手機嘅興起而被取代。不過剛於去年聖誕，其新推出嘅WindowsPhone8智能手機Lumia 920，喺歐美多個市場好受落，跑贏iPhone 5。Nokia亦乘勢向中移（00941）提供專為TD3G網絡而設嘅Lumia920T，作為中移首款WP8系列嘅3G手機，好可惜，正當中移借農曆新年旺季力谷新機嘅同時，Nokia嘅新機供應卻現不足！
好多人都話，手機生產商為咗力谷新機，好多時都會以所謂嘅「飢餓銷售」，營造一機難求嘅市場錯覺。不過對Nokia嚟講，Lumia920T喺內地所面臨嘅斷貨危機，隨時會影響其重獲內地市佔率嘅機會，事關面對來勢洶洶嘅國有品牌，消費者隨時會因為失去耐性，而選擇放棄購入Nokia嘅產品。
究竟呢款手機嘅供應有幾緊張？據外電引述中移發言人表示，到一月底Lumia 920T預定量雖達9萬部，但Nokia嘅實際出貨卻只有3萬部左右，搞到中移旗下嘅多個分銷點根本無貨可賣，做宣傳賣廣告都食唔住新春檔期喇。