香港出晒名物質豐富，水貨客搞到港媽要四圍撲奶粉，兼且北區大混亂，真係離譜，絲絲請教灝天環球投資經濟及財富管理顧問陳寶明，佢話如果擴大中英街，或者喺新界東北起個大型商場，等內地人同水貨客買完嘢就走咪搞掂囉。係喎，不過唔知到時本地生產總值（GDP）要點計呢？
GDP主要由消費、投資、政府支出同出入口呢啲組成，走水貨啲貨價喺出口數據反映唔到，計咗落消費度，而坐地鐵運貨呢啲成本一樣計入消費，如果第日起個商場又點計呢？佢話咁方便咗水貨客嚟多啲買多啲，就會谷大咗服務同貨品消費，嘩咁香港經濟咪再好啲！
佢笑笑口話，內地人對食物系統產生信心危機，就算內地有新西蘭出品嘅奶粉賣，啲媽咪都擔心中途畀人換咗，唔怪得之佢哋落嚟香港辦年貨啦！走水貨真係一盤好好嘅生意，個物流系統可以將啲貨散去全國，都咪話唔犀利。
余詩韻