拆市區高爾夫練習場起樓，教學用地、「香雞地」統統攞去起樓，遠水救近火的特區政府，為爭取表現及修正長久畸形的房屋政策，顯得狼狽之極。
近期，一大堆經紀WhatsApp邢理強，話特區政府周五會再出幾招壓抑樓價，內容辛辣。堅定流？明日自有分曉。
傳聞幾招：BSD由現時15%加到30%，簡言之是趕絕所有「非三粒星」買家，可以估計，主攻鬼佬或同胞買家屋苑首當其衝。第二個物業額外畀稅5%，表面看政策影響有限，老婆買完老公又可買，唔加名，不過互相為手上物業擔保申請按揭，換樓又點計？係咪一定先賣後買，才可避過5%稅金？
傳聞又話800萬以上物業按揭額外收緊一成貸款，即係由目前六成上限收窄至五成，要知今日黃大仙都去到萬二蚊呎，即係買個七百呎已經過界，要搬四、五球首期、印花稅及佣金出嚟，首置只能諗離島及新界。
若揸住兩間想買第三間，Sorry！唔能夠再做按揭，請一炮過付款！就算腰纏萬貫，一次過拎一千幾百萬買樓唔係容易，把雞蛋放晒一個籃，機會成本同風險都拉高，潛台詞係叫有錢人唔好再買樓。
最後，第一季推一萬個居屋樓花，樓花唔同現樓唔可以用嚟住人，政府到底係滿足投機需要？抑或住屋需要？或者佢自己都唔知。
頭幾招，估計會令樓宇需求減少，不過，現時業主怕換貨之後，要被新招綁死，供應一樣會大減，超低持貨成本下（低息），樓價未必大跌，不過成交肯定大縮囉。
INVEST 邢理強