絲絲講場：「金磚四國之父」榮休

現年五十五歲嘅奧尼爾自一○年九月起擔任高盛資產管理主席一職，之前就喺該部門做首席經濟師。佢喺一九九五年加入高盛擔任合夥人，喺○一年成為環球經濟、商品及策略研究主管。「金磚四國」一詞就係佢喺○一年創嘅，指西方經濟體對環球經濟嘅影響力遞減，取而代之嘅係中國、俄羅斯、巴西及印度四個新興市場。

高盛發表聲明，讚揚奧尼爾過去喺高盛差唔多廿年表現出色，仲指不論佢喺高盛擔任咩職位都積極為客戶提供佢對環球經濟同市場嘅睇法，而佢有關「金磚四國」嘅言論挑戰大眾對新興市場嘅傳統思想，對社會同經濟帶嚟好大影響。

主席一職「後無來者」

高盛資產管理會繼續由蒂姆奧尼爾同埋萊恩兩位聯席主管帶領，而高盛無打算搵人接任主席一職，因為呢個職位其實專為奧尼爾而設。