Market Insight：山東墨龍搭順風車

去年澳門賭場單係博彩收入就增加13.5%至3,041億澳門元，多過鼻祖拉斯維加斯5倍，以35%博彩稅率，一年澳門政府間接由賭枱賺到1,064億元稅金，仲未計兩三百億其他收入。去到十二位數字，計算機都未必篤到，看官唔知條數大成點？

舉個例，香港去年利得稅1,180億，薪俸稅約520億元，換句話，老董、貪曾若果早年真係准大大嶼山建賭場，香港企業可以唔交稅，又或者港人可以取消薪俸稅之餘，仲年年有錢落袋。

放大圖片

放大圖片

中國人好賭，可以估計打壓一排後，澳門街好快回復光輝。近半年濠賭股確實升得唔少，唔少芬佬都想搵個藉口賭番轉頭，依家去到三月係反貪高峰期，都係唔好做莊走去做閒好。

地產Call小試牛刀

前晚德國總理默克爾拍心口，支持西班牙首相拉霍伊，消息支持歐股、歐債反彈，道指也升近百點，可惜，近期升唔起的港股，完全係有心無力，昨恒指收市升得108點報23,256點，只係周二536點跌幅的五分之一。睇沽空，連續兩日沽空佔成交比重高於一成，淡友死咬住唔放，博港股24,000點前點都要跌番一陣，盛傳周五政府對樓市再出招，新地（00016）連跌第九日，沽空佔成交兩成，高位計股價唔見十蚊。

今次傳港府五招，連古勝屋企人也收到地產經紀「依貓」，確實罕有，周五會唔會係壞消息出盡，地產股反彈？由消息醞釀近兩星期，不排除短線有此可能，睇番地產分類指數自去年六月，未試過跌穿50日線多過兩日，是中線走勢一大參考。

雅士利有勢破頂

近日中港地產股齊齊報跌（指數成分股就有華潤置地（01109）以及中國海外（00688）），指數跌得特別急，昨日見恒生地產分類指數報32,367點，與50日線32,328點一步之遙。如果隊到今日收市，睇怕殺過龍機會好大，不妨搵番隻啱價錢貼價地產輪，試試刀仔鋸大樹。

昨日當炒板塊，當數全城熱話的奶粉短缺事件，兩隻奶粉股完全無視地心吸引，周初市跌照升，昨日市升就升得更勁，合生元（01112）抽升1.7元報35.25元，再創上市新高，基金開始放緊紙鳶，訂止賺可以放心繼續揸。雅士利（01230）鑊氣雖稍斂，惟股價有挑戰2.8元頂位之勢，早前已發過盈喜，業績期揸佢風險唔大。

內地短期可能推第三輪頁岩氣探礦權招標，與第二輪相若，估計中標企業未來三年投入資金達128億元人民幣，消息令靜咗一排的相關股份，全部撻番着，安東油田服務（03337）昨勁升12%，陰陰乾近一個月的宏華集團（00196），一日報晒仇，升10.5%，華油能源（01251）升3.4%，山東墨龍（00568）亦升2.9%。

去年十二月初古勝曾推介過墨龍，當時股價只係3.2元，一月中升至4.21元高位，成交減少，股價以時間消化升幅，在3.7至4元之間橫行整固。老實講，呢間內地三大石油石化集團（中石油、中海油及中石化）合資格油套管供應商，近期只有一單獲批發債消息，無乜新聞。

駿科轉型惹憧憬

不過，股價炒完一輪後跌唔落，仲要其他頁岩氣股價有雙位數升幅，佢仲係老僧入定一樣，吸引到下注意。基本因素上，公司慣常在四月初公布成績表，截至去年九月底首三季賺1.2億元人民幣，最後一季段估無大礙，條數點都唔衰得過早兩年。昨日成交初見鑊氣，應該可以放心搭轉順風車也。

股仔各自各精彩，駿科網絡（08081）轉型，向中國保綠資產（00397）收購醫療業務Luck Key，股價即彈19%。駿科變身值得憧憬，Luck Key目前於香港經營9間體檢中心及2間化驗中心。若見股價回吐，不妨買些少玩吓。

古勝