理財創富：孖妹S檔案：細股票行 年關難過

慘況一：「一業兩管」待遇不公

高妹： 新年流流，本應開開心心，但點解你哋苦瓜乾嘅面口呀？

王： 本港華資證券行愈嚟愈難做，遲啲仲話要實施新一輪加時，其實加時與成交上升根本就係兩回事，事實亦擺在眼前，之前加時後，港股成交有無爆升呀？無呀嘛！成交要升，係睇外圍市況、睇投資氣氛，同時間長短無咩關係。

孔慶暉

放大圖片

而且，港交所時不時就話要證券行將系統提升，加快交易速度，搞到小型證券行嘅經營成本日益增加，但又對生意額無真正幫助喎！講真，我哋又唔係銀行、投資銀行，做高頻交易係呢班銀行家，只係一班小經紀，但港交所就咩都要一視同仁，根本無從華資證券行嘅角度出發，其實業界內有不少措施對我哋都唔公平的！

朱： 最慘係證監會「一業兩管」，每當華資證券行有咩行差踏錯呢，佢就拉人封艇；相反投行出事，如雷曼爆煲事件咁樣，人哋就可以賠錢了事。其實作為證券業界一分子，我哋做小經紀嘅有咩要求呀？咪就係希望可以喺公平、公正、公開嘅市場做好個人本分，搵餐飽飯食囉！我希望特首梁振英在搞金融發展局之餘，亦應諗吓其他相關政策以扶持本地證券業可以繼續發展落去。

慘況二：賺佣少過最低工資

彩兒：我聽聞有部分經紀嘅時薪連30蚊都唔夠，咁點維持生活呀？

朱： 咁啲經紀咪惟有親身落場炒埋一份囉，佢哋希望博贏到啲錢，幫補些少收入都好呀！不過，有啲經紀真係捱唔住，就只能逼住轉行。據我所知，最多人走去做看更，因為行行企企，最舒服最好做，又或者轉行揸的士；部分有啲學歷嘅，咪去工廠做文員囉！不過，亦有好多經紀依然眷戀呢個行業，希望繼續做落去，於是咪朝早返證券行打工，四、五點鐘收工後就去揸夜更的士，揸到凌晨一點先正式收工o架！

孔： 話你知呀，有啲唔願走嘅經紀真係靠食老本撐落去，佢哋希望等到曙光來臨。你諗吓喇，自己落場炒埋一份，你估包贏o架？輸咗就拜拜o架喇！唉，做股票經紀呢行，其實只有三條路行：第一係發達；第二係「走佬」；第三就係「獻世」，好似我哋咁樣，對政府點樣失望但都唔肯離開老本行。

慘況三：銀行搶客 行家「割喉」

高妹：雖然我炒股都係幫襯證券行，但近年不少銀行都力谷證券買賣業務，佣金都愈來愈低了。

王： 講真，雖然有行家搞「割喉式減佣」，又搞「零佣金」優惠，但佢哋唔係敵人，你估以本傷人唔痛o架？呢行無人做蝕錢生意會周圍講嘅；相反大型銀行先係搶生意嘅最大勁敵呀！

試想想，銀行資本實力雄厚，人多、資源多、理財產品多，佢呢邊將證券佣金平畀你，另一邊就叫你買其他理財產品，最終咪又係賺番你錢；但證券行唔同喎，主要靠佣金收入，但每年交牌照費、人工、電話費、電腦及資訊機等費用，搵搵埋埋都唔知慳得邊樣？

孔： 所以我哋同銀行根本無得鬥！經紀賣嘅係專業分析及貼身服務，真係一對一咁照顧客戶需要，但銀行就一定做唔到，你咪自己上網落盤囉！不過睇番過去幾年，通常死機嘅都係銀行，而唔係證券行，你話幾諷刺呀！　

慘況四：隨時多三五間「收檔」？

彩兒： 睇番聯交所資料，踏入今年一月，已有三間證券行「收檔」了，睇嚟呢行真係幾悲慘喎！

王： 問心嗰句，我唔排除今年仲會有證券行相繼執笠，再多三、五間並唔係出奇事。現時一間細行，員工人數可以十隻手指數得晒，有啲證券行為咗節省成本，一個人做兩個人嘅工作好平常，仲未計啲營運雜費呢，加上本地證券行嘅市場佔有率少，又唔夠銀行去爭客，有時證券行嘅每月收入真係剛剛足夠應付開支o架喳！

高妹： 早排我仲聽聞，現時部分證券行嘅賣盤價已經跌至300萬就有交易，真係平過去買間蝸居。

朱： 不過現時賣盤嘅多數係B組證券行，因經營成本比C組行大，同埋C組行嘅老闆都好有錢，即使已經七、八十歲，但個心仲眷戀呢行，又鍾意落場炒股，所以佢哋咪開間證券行過吓日辰之餘，又可以有個地方同班老友記落腳。

彩兒： 唉！雖然我同高妹只係散戶，無咩可以幫到手，但聽到你哋嘅苦況，個心都有啲唔舒服！惟有希望蛇年係個好開始，港股成交增多之餘，各位仍在困苦邊緣掙扎嘅經紀們，可以生存落去，早日見到曙光喇！

（高妹）（彩兒）

若有料報畀高妹同彩兒或有嘢問，可電郵money.biz@opg.com.hk