練跑中暑 化險為夷
絲絲早幾日都去咗跑步，跑4公里都喘晒氣，但同Thomas嚟緊比賽要環山跑50公里相比，真係小巫見大巫。佢話估計至少都要跑九個鐘，如果冇練開都幾吃力。於是Thomas最近都keep住練跑，務求以最fit狀態迎戰。
不過，早幾個星期日，Thomas跑到尾段突然中暑仲差啲休克，真係嚇死絲絲！原來佢帶唔夠水，又唔記得帶電話，仲同太太分開跑，真係犯晒行山及練跑嘅大忌！
好彩Thomas冇堅持跑落去兼遇到兩個好心人，畀咗罐寶礦力佢飲，仲借埋電話畀佢，咁先化險為夷咋！絲絲希望聽到Thomas奪獎嘅好消息，不過真係要萬事小心！