絲絲講場:馬雲派完花紅醒利是

阿里巴巴集團員工有好消息!集團主席馬雲宣布,除咗年終雙糧、年終獎及期權獎勵之外,仲準備向全體員工派發特別紅包。哈哈,總算馬雲有良心。

唔好誤會,絲絲唔係想話馬雲平時刻薄員工,只不過阿里巴巴舊年經歷完B2B私有化,又馬不停蹄進行業務整合重組,五月嗰時仲同雅虎簽訂回購20%股權嘅協議,真係忙足全年冇停過手,一班員工日日返工就似足打仗,你都咪話唔辛苦!

生意超標 獎金加碼

馬雲見到班伙記為公司盡心盡力,就向員工發電郵話,去年公司各項指標全部都超額完成,決定額外再發放特別紅包,獎勵員工過去一年嘅努力,人人有份,永不落空。咁至於紅包入面有幾多錢,就視乎員工喺阿里巴巴年資而定,但絲絲相信啲獎金加加埋埋,都夠每位員工過番個肥年嘅。

整裝待發 今年上市

馬雲仲話,今年唔單止會加人工,如果集團繼續表現理想,就會延續13個月年薪嘅做法,即係年年都有雙糧出。之但係,外界傳馬雲有意加快集團整體上市步伐,阿里巴巴整體最快今年來港上市,為回購雅虎嘅股份鋪路,絲絲睇怕阿里巴巴員工今年都要由年頭忙到年尾,先至逗到封大利是喇!

余絲韻