遠東環球（00830）自從舊年獲中國建築（03311）入股成為大股東後，股價一直喺1.5元橫行，但近排表現突出，短短一個月就勁升六成。一半係因為公司今年接獲嘅工程合約，預計會有強勁增長；另一半係因為受資金炒作內房殼股注資概念。
唔好講笑，根據過往經驗，內地最大建築企業──中國建築工程總公司手下真係猛將多多，譬如旗下中國海外（00688）係中港兩地最活躍嘅地產發展商。至於從事外牆工程嘅遠東環球都加入埋，以配合母公司業務走出海外及憧憬美國樓市復甦。遠東環球今年頭兩個禮拜已經新簽咗啲工程合約，價值3.36億元，相等於公司全年目標嘅19%。Prof. J估佢要全年標達應該都無難度，何況仲未計如果母公司分判啲工程畀佢哋，接獲嘅合約升幅有機會仲誇張。
而另一半原因係內地企業一向都配合國策走出去，盡量利用依家人民幣嘅強勢匯價去海外買平貨，進行變相融資。近排市場上嘅炒殼注資活動一面倒以內房及相關行業最多，大部分憧憬母公司會將自己嘅房產業務注入，令到遠東環球都成為其中之一嘅炒作熱點。
如果資金繼續炒作內房殼股注資概念，而殼股個「故仔」又動聽的話，都不妨小注跟入，不過最重要係記得要適時落車。繼續追蹤，出發！
香港大學電子金融服務榮譽助理教授 徐燦傑