絲絲講場：港交所後備大腦曝光

war room應付突發災難

war room表面睇好似冇乜特別，只係一間普通會議室咁，有會議枱，仲有廿部終端機，點知職員一按掣，掌握住港交所大腦嘅控制室就即刻出現喺絲絲眼前，而且仲有個超大屏幕，報告住全個交易所最新嘅資訊情況，場面就同電影裏面當美國遇上國家災難時，總統控制住全國情況有啲相似。

嘩！war room有咁大任務，難怪保安超嚴密，平時閒雜人等一概免問，真係連烏蠅都飛唔入！

過百經紀用設備託管

雖然war room設計非常高科技，但相信行政總裁李小加一啲都唔想用，因為war room係當交易系統「當機」、或者畀「黑客」入侵等情況至會啟用，裏面設有視像會議，方便港交所高層指揮，而war room內嘅終端機亦可改動交易系統。設備咁齊全，都係希望喺最短時間內作出應變。

換句話講，好似年前發生嘅「披露易」網站畀黑客入侵事件，有咗war room可能就唔使咁多公司停牌半日！

港交所冇安排參觀設備託管服務，但主席周松崗就話依家已有100個市場參與者參與，大小經紀各佔約一半。大家最關心梗係一旦容許內地個人投資者嚟港炒股時，系統頂唔頂得順，港交所就話與內地市場互聯互通技術上可行，但細節點做仍然要傾。