Market Insight：中興通訊有望跑出

唔少本地卜架行老板光顧的灣仔「富豪食堂」福臨門，去年十二月第二代掌舵人爭權告一段落，最後由五哥徐沛鈞擊退七哥徐維均，掌管港九兩間門店。坊間一直傳會借殼上市，估唔到效率咁高，華人飲食集團（08272）宣布發行2億元可換股債券方式，收購福臨門香港及九龍兩家酒家超過四成股權，後者變相借殼上市。

「富豪食堂」贏稻香

複雜的股東架構，加埋華人飲食長期疏落的交投，八卦友最感興趣係，連埋加一蝦蛟賣到六十蚊開外的福臨門，賺錢能力係咪同收費正成比。收購文件揭示，去年三月底止年度，福臨門香港及九龍稅後溢利分別為2,533萬及840萬元，以1.19億元及5,433萬元收入計，淨利潤率19.4%。

放大圖片

放大圖片

若睇番「大眾食堂」稻香控股（00573），去年六月中期成績表，19.2億元生意賺1.38億元，淨利潤率7.2%，「富豪食堂」又確實贏成兩條街，依家香港營商個個都捱貴租，唔知係兩者分別是否同自置舖位有關？

賓架們人人手揸一部的黑莓（RIM），前晚推出的新一代手機Blackberry 10，嘗試挽回蘋果公司iPhone及Android操作系統手機兩雄爭霸的局面。先不說昨日未見老友們談論，單係網上睇發布會，古勝直覺是黑莓敗局已成。

曾盛傳想透過收購黑莓，染指商務智能手機板塊的聯想集團（00992）剛公布第三度業績，盈利達2.04億美元，按年升33.5%，收入達93.59億美元，較去年同期升11.8%，兩者都比市場預期理想。然而，聯想股價自去年十二月底在7元邊起步累積升幅唔細，公布業績後反而見大孖沙獲利沽盤鎖定利潤，昨日股價要跌0.23元報8.07元。

全球個人電腦市場按年跌8%，聯想市佔率仍在上升，抵銷了相關影響，季內銷售量升8%去到破紀錄的1,410萬部，個人電腦業務收入升7%至79.68億美元。

Android帶旺手機

喜出望外是，手機業務第三季出貨量900萬部，保持內地二哥地位之外，比分析員預期更早通過收支平衡點，平板電腦銷量升77%，同樣見轉虧為盈。現價聯想預期市盈率14.2倍，如股價回到8元樓下，估值開始有吸引力。

近幾個月，蘋果公司股價由700美元樓上，隊落四百幾美元，教主Steve Jobs生前最唔想睇到Android坐大，可惜未成功先成仁。Android佔了智能手機系統市場半壁江山，最受惠莫過於聯想一類擁有高效率生產線的公司，迅速搶佔足夠市場份額。

聯想手機業績虧轉盈，加上Android在內地冒起迅速，出貨量與聯想不遑多樣的中興通訊（00763），同樣可炒逆轉故事。最近管理層透露去年手機付運量3,500萬部，超越全年目標的3,000萬部，一三年集中高端智能手機及4G手機，出貨量有望再升四成至5,000萬部。由於手機佔收入比例高於聯想的7至8%，也不難解釋近期股價強勢的原因，比歷史估值低近兩成五，估計上半年還有上升水位，古勝估年內有條件見18至19元。

金礦股蠢蠢欲動

昨日提及嘅家電股，果然未受家電下鄉補貼政策如期告終而出現大幅波動，相反創維數碼（00751）更逆市升6.7%，短線企穩10日線4.52元樓上應該仲有得去。

此外，見到靜咗兩個多月的金礦股似在蠢蠢欲動，中國黃金國際（02099）升3%、招金礦業（01818）升0.6%，紫金（02899）逆市靠穩，短線不妨多加關注呢個板塊，若然確實有熱錢流走，魚缸沽壓漸增，資金將流向避險板塊，則金礦股有望重展活力。

古勝