Market Insight:內銀股安心撈底

唔知大家有冇去賭場玩過骰寶,連續開七鋪大,會想試吓買細。唔經唔覺,港股從去年六月初嘅18,056點起步,至今升浪已延續超過七個月,仲一直未見一個較具規模調整,近兩星期,愈來愈多評論貼大市見頂,偏偏港股狂牛就係唔願回頭。

昨日恒指跌16點報23,655點,高盛批工行(01398)上板,主板成交反彈至756億元,指數波幅極窄,恒指高低位相距只有105點,唯一較理想的指標,是大市升跌股份比例反彈,升跌是53對47,是過去五個交易日最高。二三線經過一輪調整後,炒風有復燃嘅迹象。前日話亞洲貨幣有回軟迹象,有可能是資金流出股市先兆,而過去兩日港匯亦有頗大回吐壓力,由7.754跌至7.760。

博開細仲係五五波

記得去年十至十二月中旬,港匯一直緊貼着7.75強方兌換保證,要勞動金管局多次注入港元應市,魚缸也進入禾雀亂飛的瘋狂,開完七鋪大是否要立即要去博細?古勝相信機會仲係五五之比,事實上,港股今次順利升至一○年下旬至一一年上旬在23,345至24,988點高位形成的蟹貨區,也實在需要時間讓投資者鬆綁鬆綁。

美資行高盛,○九年至今幾乎一年一度減持手上工行股份,周一再以5.77元,較市價折讓3%配售13.51億股,套現約10億美元,假如對上一次,即一一年四月高盛持股量低於5%的「隱身線」後無再沽貨的話,估計其手上還保留30億股,唔計多年收息,仲有80億元以上帳面利潤可以隨時落袋。

睇番一一年高盛批完工行後,股價級級落,接貨者要捱價的往績,佩服高盛時機掌握之好外,也替投資內銀股的股民有些少憂心。然而,昨日飯局,聽有份參與的賓架話今次反應估唔到咁熱烈,超額4倍以上,加埋工行股價全日都無試過跌破批股價,情況似乎唔係想像中咁壞。

唔少中港股票基金,都錯過去年第四季的升浪,唔少近日的頭痕到底應該買甚麼。歐美的銀行股在過去半年升幅驚人,相比之下,經濟的轉捩點明顯已出現的內銀股,無論估值及升幅上,都反而及不上海外銀行。

雅士利已不宜睇淡

像工行這間全球市值最大銀行,一三年預期市盈率只得6.8倍,股息率接近5厘,在貸款質素因為經濟好轉,不再轉壞的共識底下,估值其實平得有點不合理,至少,是較歷史估值中位數10.5倍有相當大的折讓,更遑論資產質素,以及對息差更敏感,而估值又更低的中信銀行(00998)以及交通銀行(03328)。或許,精密計算時機的高盛沽貨,會帶來短期震盪,假如調整出現,內銀是較為安心可以撈底博反彈的板塊。

新西蘭奶粉供應商產品受雙氰胺污染的事件,未發酵已劇終,新西蘭大使公開道歉兼表明全面停用雙氰胺之後,加埋內地未見產品驗出有問題。兩隻奶粉股,從上周低位強力反彈,雅士利國際(01230)昨升4%報2.58元,合生元(01112)上升2.8%,報32.5元,收市計更創歷史新高,勁到無朋友!

近期水貨客來港掃奶粉搞到全城關注,同樣情況,其實在全球多華人聚居城市也有出現,事件說明,內地消費者對內地品牌信心不足,講真,中國無可能全部BB食幾百蚊人仔一罐的水貨奶粉,中間價位,有外資股東參股的,始終會有市場。近幾個月內地多次傳出研究放寬一孩政策,兩隻之中,雅士利仲未返回早前高位,值得花時間睇睇。

入市搵實力股埋手

醫藥股板塊亦有異動,廣州藥業(00874)經已連升三個交易日,昨日一度高見18元,收報17.56元,升2%;威高股份(01066)上升3%;最靚係隻同仁堂科技(01666),股價創52周新高20.1元,收報20.05元,升幅8%。

呢期係流感高峰期,加埋內地北方空氣污染情況嚴重,多人病自然開正醫藥業呢瓣,但見游資都好醒目,選股從流動性較高嘅實力股入手,跟炒亦宜跟住資金走,不宜吼落後二三線股,皆因呢期細價股氣氛已不如前,貪價細買着隻唔行嘅就真係無癮!

古勝