證券及期貨專業總會會長王國安向來自稱為「弱勢社群」，更自嘲「冇財冇勢又冇面」，唔知係咪因為咁，佢早前邀請咗證券界兩大巨頭，立法會議員張華峰同金利豐老闆娘朱李月華，做該會嘅名譽顧問，實行幫個會省靚招牌，壯大聲勢。
王國安話，以前證券及期貨專業總會係冇名譽顧問嘅，由於兩個人喺業內知名度高，更重要係佢同兩人喺好多範疇嘅理念接近，好似港股食飯時間、經紀佣金同期指夜市等等，所以搵佢哋做名譽顧問。
佢仲話，金利豐旗下好多員工都係該會會員，早兩年前佢已邀請過朱太做該會名譽顧問，但當時朱太推咗，早兩三個月前朱太至應承。朱太最近榮升證券商協會主席，對本地證券業發展肯定會更關心。
至於張華峰，王國安話舊年立法會選舉時有幫佢拉票，選完無耐就邀請張華峰做名譽顧問。
中小經紀依家最關注嘅就係下個星期一喺立法會傾期指夜市，支持同反對兩派，到時必定出盡渾身解數，而港交所尋日就澄清，無意微調期指夜市嘅價格波幅，認為5%上限價安排好合適。