香港地少人多，原來垃圾更多，近期城中熱話，係政府未來要點樣處理每日萬多噸垃圾的問題。
政府早已爆響口，話現行三個垃圾堆填區，數年內將會爆滿，源頭減廢又十畫未有一撇，本來梁特首選舉時話必要時才諗興建焚化爐以解決問題，但上場唔夠半年便要焗住上，提出要起焚化爐。
堆填區唔可能無限擴建，本來把垃圾燒掉，確是無得揀下選擇之一。可是翻查資料，建爐由籌劃到落成要七至八年，閒閒哋一個爐要使150億至200億元，兼每年花數億元營運開支。
而且，也只能消化每日本地垃圾當中的兩成至兩成五，先不談是否物有所值，只怕年年遞增的垃圾處理需求，第一個爐仲未起好，第二個經已需要動工。
邢理強覺得與其燒垃圾，政府唔一定需要動用大筆公帑出手建爐。近年，日本在垃圾發電技術持續突破，有毒廢氣排放量已遠低國際標準，香港兩間上市電力公司，也早做過垃圾發電可行性研究，認為有可為，只係遲遲未見政府叩門。
如高官可放下成見，慷市民之慨把垃圾送晒畀發電廠，一家便宜兩家着，至少住近堆填區的居民，肯定相當支持這項德政。
INVEST 邢理強