依家好多精品名牌為咗宣傳品牌形象，都會請明星做代言人，尤其中國市場咁大，大明星做代言人嘅身價唔高就奇。話說最近有隻做手錶生意嘅新股時計寶，都諗住喺上市嘅集資金額入面，抽2,000萬出嚟幫旗下嘅「天王錶」，請番個巨星級嘅藝人做代言人，點知傾咗好多個藝人，竟然到依家都仲未搵到！可見大牌藝人家陣嘅身價真係唔講得笑！
時計寶嘅主席董觀明尋日喺記招吐苦水咁話，公司嘅手錶品牌叫得做「天王錶」，所以都想請番個天王級嘅明星做代言人，好似周潤發、梁朝偉同劉德華咁嘅級數。
點知傾過嘅明星，個個開親都係天價，咁即係話成2,000萬都唔制。除咗價錢問題，董觀明話可能同個品牌係國產錶有關，所以今次請代言人嘅計劃，佢都話真係考起佢！
「天王錶」以前曾經由陳道明做過代言人，陳道明係本地電影粉絲都唔會陌生，佢曾經喺《無間道》電影系列都有份演出，董觀明講起陳道明真係好有個性，平時「連呔都唔打」。呢幾年「天王錶」再冇代言人喇，今次時計寶專登嚟香港上市，仲咁有誠意大展拳腳做宣傳，絲絲都希望佢好快搵到合適嘅代言人啦！