絲絲講場：滙豐首輪128萬獎勵退休

唔少人都以「退休」為理財一大目標，滙豐尋日就揭曉「快樂退休」百萬賞第一輪活動大獎得主，呢位幸運兒可以得到128萬退休儲備，真係恨死隔籬！

滙豐香港區零售銀行及財富管理業務主管施穎茵（Diana）負責頒獎畀幸運兒李女士，Diana話退休需求因人而異，及早為退休作打算就幾時都需要嘅！

即使失落咗128萬大獎，大家都唔使灰心，話咁快就有第二輪抽獎，由即日起至三月二十日，接連八星期，只要每星期答啱一條問題，就有一張coupon，以及一次抽獎機會，抽獎機會將以倍數累積，換言之，答啱八條問題，就有128次抽獎機會。

不過，今次大獎就縮咗水，退休儲備金額仲要視乎參加人數而定，若然愈多人參加，獎金就會愈多，最多都只係得88.8萬元等值嘅退休儲備咋！

至於點樣先可以增加中獎機會？絲絲第一時間向李女士取經，原來佢睇完滙豐網上嘅退休短片先答問題，溫完書先去考試，信心都大啲啦！唔講唔知，原來滙豐網站已經upload咗13條短片，而且仲陸續有來添！