Market Insight：莎莎 強得有道理

去年六月，波幅指數高位在33.39，如今累積回調60%，若非恒指波幅指數期貨玩家長期得小貓三幾隻，食唔到大茶飯，否則同期沽空指數波幅（short volatility），仲要贏得多過揸期指（恒指升29.9%）。

看官手執報紙時，美國兩單新聞應已塵埃落定，先係美國眾議院就暫時將國債上限死線，延至五月的表決，橫睇豎睇，過唔到關嘅風險應該唔大。另外，華爾街巨無霸蘋果公司，尋晚出季度業績，除最受關注的iPhone 5銷情之外，關鍵仲係主理人對新一季出貨量的指引，一眾周邊股份好似富士康（02038）、瑞聲科技（02018）得定唔得，都要睇呢舖。

放大圖片

放大圖片

蘋果公司股價去年九月突破700美元後，一直級級落，近日連500美元關口亦曾失守。留意到華爾街預測有流於保守傾向（估每股賺13.56美元，比一個月前調低2.3%），最後會唔會人人睇淡先來個反高潮，開市前記住先去money18.on.cc睇睇，先決定入市策略。

深圳國際唔值博

花無百日紅，錢（前）海概念股狂升之後終見回吐，招商局國際（00144）跌4.2%，中集集團（02039）跌2.4%，深圳國際（00152）最叻，仲有1.8%進帳，但收市價1.11元，同即市高位1.2元比較，摸頂衝入去已要坐艇7.5%。

今浪最先唱好前海概念的大行花旗發報告，話假如順利將前海幅地皮由工業轉做商業用途，可以為深圳國際增值33.75億元或者每股0.21元，畀佢目標價0.99元，尋日已經超額完成。渣打報告就展望二、三月份，深圳政府有機會發表前海詳細發展大綱，若有五倍地積比，深圳國際重估後最多每股可以值2.3元，現價計落折讓五成一，但看官要注意，如果將土地全部重估，唔少內房股折讓都仲有四至五成，相比之下，現價深圳國際值博率唔係特別高。

市場無炒賣主題，基金線消息話要留意零售消費類股份，咁啱莎莎國際（00178）異動，成交比前日多4.4倍，即市見過6.96元，創上市新高。

內地店收支平衡

截至去年十二月的第三季度營運數據，莎莎在港澳地區錄得14.2%同店增長及20.6%銷售增長，表現相當理想，儘管拆開按月數字，十及十一月同店升幅分別為20.2%及13.3%，明顯優於十二月的7.2%（主要受假期外遊市民增加影響）。不過，管理層透露去年底前內地東部及北部分店開始達到收支平衡，在規模效益漸見成效之下，今年有機會有一定的貢獻，更加吸引大孖沙目光。始終每年個人遊人次有限，多年來在內地遊客心目中已建立商譽的莎莎，回到內地開店直接賺人仔，方為長遠焦點所在。

莎莎估值向來高於同業，大行估一三年賺8.26億元，一四年升至9.99億元，預期市盈率19.1倍，同十年估值中位數20倍相差唔多。中線而言，內地業務開始收支平衡的憧憬下，莎莎未來幾個月可能會高於歷史估值，是逢低收集的好股，未有貨的，不妨先等回吐出現。

撈內房未係時候

有報道指，今年以來北京明顯加快土地供應以圖壓抑房價，但暫時睇嚟作用不太顯著，皆因去年房企主要策略為貨如輪轉，務求銷售達標同保持現金周轉量，及至上季以來市場流動性改善，股票市場氣氛好轉，房企融資活動增加，並開始積極補充土地儲備，故一線城市刻意增加土地供應嘅措施，可能要行多一段時間始見成效。

另一方面，呢期不斷聽到有內房股發債或配股集資嘅消息，大量抽水活動考驗市場胃納，就如最近分別進行配股集資嘅恒大地產（00333）同融創中國（01918），股價均失守配股價，相信短線尚須整固，想買貨嘅散戶可以再忍忍手！

古勝