未解決！未解決！香港地愈嚟愈多紛爭，點樣可以建立和諧社會？就連恒生銀行（00011）零售銀行及財富管理業務主管陳力生（Nixon），佢話「面對紛爭嘅時候唔只小學生，就連我哋喺江湖行走咗幾十年，都會束手無策」，所以佢哋決定出一分力，訓練一班「恒生和事老」，真係出錢又出力啦。
恒生聯同香港家庭福利會，舉辦咗「恒生‧家福青少年調解計劃」，教授學生調解嘅知識同技巧，有15間小學參與計劃，透過訓練300位高小學生成為小小「朋輩調解員」，讓他們認識情緒，學習處理衝突，並將調解技巧應用於校園，以至日常生活，遲啲恒生有15至20名員工仲會接受培訓，充當活動嘅義工添！
Nixon仲話，適逢今年恒生80周年，計劃將會從300名學員中選出80位『傑出調解員』，以表揚佢哋為同學們排難解紛嘅優秀表現。Nixon仲爆料話，其實恒生贊助今次活動都有私心o架！「可以趁機會裝備同事嘅調解技巧，等佢哋可以應用喺生活同工作上面」。
最後佢引用咗《論語》嘅一句話：「禮之用，和為貴」，希望參加活動嘅小朋友，可以帶和諧嘅訊息畀香港社會啦！