金融市場最忌成日受國策或者政府干預，但內地就好唔同。個市跌得慘情，散戶會喊救命，叫政府打救，中國證監會主席郭樹清講得至為清晰，講明「我哋係中國證監會唔係美國證交會」。
佢認為喺股市關鍵時刻，都係要採取必要嘅行政干預。呢啲咁激嘅言論，直情係同中投副總經理汪建熙唱反調。
汪建熙上個禮拜嚟過香港一趟，參加亞洲金融論壇，大彈中證監過去一年改革措施冇料到，又話應該要加強基礎設施同制度嘅建立，再透過市場機制發揮作用，好過直接推行措施。
郭主席肯做醜人，係因為佢始終認為中國係一個唔成熟嘅市場，盲目性好大，波動性都好大，證監會喺市場發展過程唔可以簡單咁「放羊」，就咁放手唔理，關鍵時刻都係要採取必要嘅行政干預，如果唔係市場就會好混亂。
近期A股持倉數量持續減少，市場解讀為信心低迷嘅訊號，但郭樹清反而覺得係好現象，因為反映到投資者冇因為近排大市反彈盲目樂觀。佢話自己因為職責所在，個市如果一日大升或大跌超過3%，就會好擔心，要一路留意指數變化，仲奉勸低收入同靠養老金維生嘅人，最好揀其他更安全、風險更細嘅產品，因為內地股市仲唔係太成熟，應該唔啱佢哋玩。
余詩韻