周一美國假期，美股休市，中港兩地股市一跌一升，滬綜指收市跌13點，恒指先低後高，收市升68點。大市欲跌不跌，等待似樣的調整卻不肯出現，不能跟市鬥氣，只好順勢而為，昨日恒指高位向上突破，衝至23,685點，連續三個交易日，高位都升穿23,600點，此水平有一定支持力，昨日低位23,498點，全日波幅187點，主板成交回升至724億元。
前日大市拉鋸，恒指Call輪及牛證好倉錄得4,563萬元資金流入，淡倉流入1,147萬元，惟淡倉是連續三日流入資金，好倉就扭轉了前兩日一直流出資金的方向，再睇埋昨日的技術支持位，好友彈藥實在好充足。
內銀抖咗一日氣，昨日撐得住，工行（01398）及建行（00939）合共為恒指帶來30點升幅，招商局國際（00144）因市場大炒特炒深圳前海概念，勁升8.8%收場，就算股份本身在恒指成分比重唔高，都能夠為恒指貢獻9點升幅，其他前海股深國（00152）及中集（02039）都升到甩尾。
友邦（01299）昨日彈得幾好睇，升1.5%收30元，成交較周一大增四成四，唔少仲係大手成交上板。其實，友邦近年交出成績，業務維持較高增長，在基本面支持下，股價在29.5至32元間徘徊多時，周一跌到29.5元邊即現買盤，昨日再拗腰彈，今日若企穩30元，可考慮開Call。友邦美林購（20651）今年六月十日到期，行使價31.41元，實際槓桿12倍，引伸波幅22%。
Handsome哥