金管局前總裁任志剛愛將陳民傑（Thomas）做老闆，「BB」尋日出咗世，取名為圓通財經公關公司，間公司嘅Logo係黃色及藍色圓圈組成，你睇Thomas攬住個公司Q版logo，笑到四萬咁口，就知佢幾咁滿意啦！絲絲睇番通勝，尋日宜「開市」，兼且係十八號，直情係開張吉日。
圓通嘅辦公室布置簡潔，一入去就見到任總送贈嘅題字掛咗喺牆度，「圓不偏倚，通無阻礙，財匯八方，經傳千里」，簡單十六個字就正正包含咗「圓通財經」嘅意義喺入面。可能因幅提字擺得咁當眼，兼且又「圓」又「通」，十足任總以前成日講嘅題材。為免生疑，任總一開口就同佢「劃清界線」，強調圓通個名唔關佢事，亦唔係佢改喎。
Thomas出任金管局公關多年，尋日到賀嘅老友勁多，淨係送嚟嘅花籃已經擺滿成個辦公室，名副其實逼爆，難得大家唔介意，逼住嚟傾偈，既係賀Thomas榮升老闆，亦都係大家聯誼嘅好時機。任志剛尋日就拖埋太座，齊齊以紫色情侶裝嚟祝賀，絲絲仲見到金管局前高層、打大鱷女將葉約德嚟賀Thomas添。
喺切餅儀式上，Thomas公開多謝太太多年嚟支持，有人起哄要佢錫番啖老婆仔，佢咁怕醜，話之你哋起哄，當聽唔到喇。