硅谷雲集晒全美國最叻嘅IT公司，咁多間龍頭公司聚埋一齊，競爭就一定激烈。好多人都會覺得，各高層一定會因為公司之間嘅競爭而搞到勢不兩立，大家唔妥大家。不過谷歌高層Mike Cassidy尋日喺社交網站facebook發布嘅一張相，就揭示咗一班CEO同高層私底下原來Friend過打Band！
絲絲睇過張相，入面就有齊12間美國最大IT公司嘅CEO或高層，好似聖經故事入門嘅十二門徒咁。Dropbox嘅CEO休斯敦、雅虎靚媽CEO邁耶、Twitter嘅CEO Dick Costolo、Yelp嘅CEO Jeremy Stoppelman同埋蘋果公司、谷歌公司嘅高層都喺晒度。
絲絲睇到佢哋咁friend都嚇咗一跳，因為蘋果同Dropbox係競爭對手之餘，之前仲對簿公堂；而谷歌喺○九年打算收購Yelp就遭拒。所以呢張相一發布就好轟動，一班科企高層嘅關係真係非比尋常！
不過張相仲揭示咗雅虎從谷歌挖走邁耶嘅原因。邁耶未上任之前，好多人都擔心佢無獨立管理一家公司嘅經驗會做唔掂。不過呢張相就顯示咗佢廣闊嘅交友圈子，事關邁耶同在座咁多位高層同CEO無論係公事、私事上都有聯繫。