絲絲講場：「最佳行長」周小川難裸退
曾經講過「年紀大了，總要退休的！」嘅人行行長周小川，其退休問題一直受到外界廣泛關注，其接任人究竟係中國銀行（03988）董事長肖鋼，定係現任中證監主席郭樹清，至今仍未露出端倪，但絲絲最近聽聞，即使小川哥真係退休，都唔會係「裸退」，仍然會為中國金融界作出貢獻。
去向料兩會前揭盅
多次被監管機構選為全球同亞洲「最佳央行行長」嘅周小川，一直係整個中國金融界掌舵人，若然「裸退」似乎有啲可惜。究竟小川哥退休嘅具體安排會係點，嚟自北京嘅友人向絲絲賣個關子，應該唔係大家所諗會去做學者執教鞭咁簡單，但安排係點樣，友人話今年兩會前很快揭盅，唔使心急。
另一件更弔詭嘅事，係接任人行行長大熱門之一嘅肖鋼，原定去年底離開中國銀行，但至今都只聞樓梯響，未見人下來，令小川哥嘅去向顯得撲朔迷離。
余詩韻