絲絲講場:美國大學QFII各有愛股

呢排有關QFII(合格境外機構投資者),同RQFII(人民幣合格境外機構投資者)嘅新聞特別多,方向只有一個——擴大規模,除咗一眾金融機構之外,最開心就係美國嘅大學,皆因佢哋一早已有QFII資格,但口味就好唔同囉!

絲絲睇咗中證監最新統計,原來舊年有72家QFII獲批,總數已多達207家,美國十大著名大學中,有6間都加入QFII行列,包括耶魯大學、史丹福大學、哥倫比亞大學、哈佛大學、普林斯頓大學同舊年九月先獲批QFII資格嘅杜克大學。

耶魯哥大風格各異

正如每家大學都有佢嘅特點,佢哋投資對象都有分別,好似耶魯大學咁,就偏愛二線藍籌股,上年就持有過中國國貿、伊利股份、雲南白藥、格力電器,舊年中國國貿嘅股價累計升咗兩成七,果然眼光獨到!

哥倫比亞大學投資就比較分散,而且特別鍾意買新股、中小型同創業板股,舊年就曾經買過15隻國企股,喺滬市買過明星電力、秦嶺水泥;喺深市中小板就買入咗卡奴迪路、克明面業;創業板則買入新文化和銀邦股份等4隻股。

當中中小板嘅喬治白同創業板嘅新文化、銀邦股份都係上年七月先上市,但哥倫比亞大學一見到就大舉買入,佢仲係新文化嘅第一大流通股東添!