絲絲講場:港交所變靚 紅衫仔凋零

港交所(00388)嘅交易大堂翻新裝修工程,唔經唔覺已完成咗七七八八,預期最快今個月底會正式完工。使咗錢搞大翻新後,交易大堂梗係會煥然一新。絲絲未去過現場睇過實景,但聽聞新交易大堂出市櫃台範圍愈縮愈細,事關出市員近年得番百零人左右,為咗更有效利用地方,惟有將佢哋搬密咗,騰出多啲地方嚟做傳媒港股直播室。

出市員剩77人

睇番港交所最新嘅交易大堂交易員數字,喺去年十二月十九日,出市員數目已跌破一百大關,得番77名,即係話好多出市員都返番去辦公室,「紅衫仔」名副其實愈嚟愈少!

出市櫃台少咗,整個交易大堂畀人感覺亦都開揚咗,好似大咗咁,而且仲愈來愈有電子feel添。事關以往交易大堂展覽廳掛出好多幅巨型交易所歷史圖片,見證交易所多年嘅發展,但依家就全面電子化,唔再有「硬照」,而係裝咗多個超大型電子屏幕,播放交易所歷史片段。

歷史圖片電子化

其實依家好多新型建築物,都裝有超大型電子屏幕,「閃吓閃吓」,幾好呀!領導人嚟到交易所參觀,氣氛都熱鬧啲!

下個月就到農曆新年,聽聞金融服務界八大經紀團體已擇咗吉日,二月廿八日喺新交易大堂舉行新春團拜,以往佢哋搞團拜都擠得水洩不通,依家交易大堂裝修完,騰出更多面積,就唔驚「逼爆」交易所喇!

余絲韻