香港曾經喺上世紀雄霸亞洲足球壇，孕育出「亞洲球王」李惠堂、「譚銅頭」譚江柏（譚詠麟之父）等名將。身為足球迷嘅恒生銀行（00011）執董兼環球銀行及資本市場業務主管馮孝忠，同三千幾名學生，齊齊欣賞香港話劇團製作嘅音樂劇《頂頭鎚》。
喺《頂頭鎚》首場演出，恒生搞咗一場學生專場，邀請咗來自四十間學校，總共三千三百幾名中、小學生免費入場觀賞，當中不少學生係來自深水埗、天水圍、屯門區嘅低收入家庭。
睇完表演，學生仲有機會參加演後座談會，同劇中主要演員、編劇兼導演，同埋李惠堂個女李姍姍傾偈添。
講番套音樂劇，故事係講述當時代表中國隊出戰奧運會嘅香港年輕人，眼見中國正值日本侵華、國共內戰嘅內憂外患，政府又攞唔出足夠經費，球隊就喺比賽前展開廿幾場亞洲巡迴表演賽籌錢，而喺巡迴賽之中更加未輸過一場，認真犀利。