早兩日係大吉日，絲絲聽講嗰日廟宇香火都特別鼎盛，尤其係佛堂門天后廟呢啲古廟！絲絲早兩日都去咗西貢布袋澳嗰間天后廟，遇上十多位操普通話嘅信眾，據管理廟宇嘅人話，佢哋係中字輩嘅大型國企航運公司嘅老總喎！
絲絲事後問過呢間公司嘅公關，問係咪一班老總過嚟香港開會，順道去參拜？佢唔肯回應班高層係咪去過，但有行內人同絲絲講，即使有都好正常，因為航運公司嘅經營，同大海息息相關，搵天后保祐都理所當然喎。老總們肯抽時間去祈求今年「順風順水」、行業再風生水起，都係好事。
唔講唔知，原來好多內地人，近年到訪香港，都會順道參拜。絲絲就問過廟祝，佢都話今年開始多咗操普通話口音嘅人，打去問間廟嘅位置同交通情況，相信唔少內地人慕名嚟參拜喎。