全球最大嘅網上零售書店亞馬遜創辦人貝索斯（Jeff Bezos），被譽為蘋果公司已故教主喬布斯之後，世上最有頭腦嘅科技人。之不過，同樣亦有人批評佢淨係識講長線投資，買佢嘅股票揸十年八年都可能得個吉！更有啲科技界嘅同行，批評佢所謂創新嘅產品，其實都係麻麻哋，好似好新款嘅板腦Kindle咁，只不過係引誘客戶幫襯嘅贈品！
最近佢接受刊物專訪，一於大平反。佢話亞馬遜九七年上市嗰陣，就講明自己會以長線發展做經營理念，所以佢推出嘅產品，以至公司股價都係睇長線嘅，亦即係亞馬遜唔啱嗰啲渴望短線獲利嘅朋友。
至於咁多人批評自己，貝索斯話自己過去講嘅所有說話，總會有幾個人誤解嘅！
亞馬遜發展到依家，有無擔心過會被人取代？貝索斯笑住講：「我唔會每日瞓醒都諗有邊幾間公司可能會打瓜亞馬遜。我知道有啲公司嘅年度大計都要列出前三位嘅競爭對手，然後就以打低佢哋作為鼓舞自己嘅動力。但我講你知，亞馬遜會留意其他公司，但我哋嘅成功唔係依靠咁嘅方法嘅！」