絲絲講場：劉應彬棄聯匯 轉行讀社工

金管高層連環大執位

所謂江山代有人才出，金管局呢一轉調動可謂不小，兩個助理總裁解甲離任，分別係退休嘅萬少焜（Nelson），同打算重返校園嘅Edmond，金融穩定監察主管鄭發（Henry）就榮升助理總裁，另一個助理總裁人選就係大熱姿態入局嘅財庫局財經事務科副秘書長陳維民。

Edmond離開金管局之後，會留返喺香港讀社工，即係轉個形式繼續服務社會，仲話無意到私人機構任職，Edmond在任期間負責好多貨幣穩定工作，包括睇實聯匯等，放低高薪厚職，重新讀書走入基層，絲絲覺得用「志向高潔」形容佢最啱。

李達志接班 鄭發升官

金管局總裁陳德霖都話對佢嘅離開感到好可惜，而五月開始，就會由依家睇機構拓展及營運嘅助理總裁李達志（Howard）接佢個位，新加入金管局嘅陳維民四月中開始接Howard個位，又負責同傳媒打交道。

最值得恭喜嘅係升官負責銀行監理嘅鄭發，佢以前都做過銀行監理部，未升官嘅Henry唔單止負責金融穩定監察，亦身負財資市場公會市場職責，舊年就負責檢討同改良香港銀行同業拆息機制嘅報告同建議，一樣係各瓣金融市場嘅老手。