絲絲講場：大款送禮轉晒口味
茅台一向係內地名酒，最適合用嚟送禮，但胡潤百富發表嘅「男性富豪最青睞的送禮品牌」頭十五位嘅排行榜顯示，茅台已經由上年嘅第五位，跌到落第十三位，而排頭五位嘅都係歐美品牌，好似路易威登、蘋果公司同愛馬仕等等，點解會有咁嘅情況呢？
內地倡廉 茅台失寵
胡潤百富嘅創辦人胡潤話，「名錶同名酒嘅消費近排都受內地政策影響，同埋受領導層換屆拖累。」事實上舊年三月內地政府已經開始，整治用公款買名酒等嘅奢侈品，舊年十二月喺軍方嘅飲宴場合更加係禁咗飲白酒，仲有新領導班子反貪腐同奢侈行為，所以話茅台喺班富豪心入面嘅吸引力肯定唔及以前。
另外勞力士錶都已經無咁多富豪吼，舊年呢個牌子排第九位，今年完全影都唔見，瑞士名錶浪琴就成為榜入面唯一一隻純手錶名牌。
絲絲發覺，啲內地千萬富豪似乎品味好咗喎，起碼買個愛瑪仕Birkin袋送禮，貴得嚟點都潮啲啦，飲酒隨時會亂性o架！
今次份報告訪問咗551位個人資產有1,000萬元人民幣（約160萬美元）以上嘅富豪，而且都係後生一群，千萬富豪嘅平均年齡係38歲，億萬富豪嘅平均年齡都只係40歲，多數嚟自北京 、上海、廣州等一線城市同埋主要嘅二線城市。