絲絲講場：建行贊助「紅魔」吸球迷客

曼聯今次同建設銀行、娃哈哈達成為期三年嘅贊助協議。呢次係紅魔鬼第一次同內地銀行達成呢類刁。曼聯商務總監Richard Arnold就話，希望呢次贊助可以拉近同中國球迷嘅距離。

獲授權推曼聯信用卡

絲絲就覺得，達成呢個協議，建行一定最開心！事關建行喺中國只有一億二百萬名個人銀行客戶，但內地就有成一億八百萬曼聯球迷。建行獲授權可以推出曼聯信用卡，球迷用張信用卡買球會嘅產品可以有折，絲絲相信內地一億八百萬球迷知道呢個消息之後，一定即刻仆去建行申請信用卡！建行可以趁機擴大客源，一定賺到笑呵呵！

其實要做到曼聯嘅贊助商真係一啲都唔簡單，個個都要有番咁上下財力同實力先得！絲絲聽講上手贊助商，即係二○○九年嘅美國Aon保險公司，四年球衣冠名贊助費就高達一億三千萬美元！不過娃哈哈作為中國最大飲料生產商、而建行就係中國四大國有銀行之一，兩間公司都有財力，夠晒照喇！