絲絲講場：劉明康技癢想學廣東話

驚嘆港人普通話進步神速

話說中文大學全球經濟及金融研究所請咗劉教授投入研究工作兼參與授課，尋日劉教授同記者朋友相聚，見到眾人普通話講到「嘞嘞聲」，感嘆「這是香港一個很大嘅進步哦」，佢憶述番十幾年前嚟港出席活動，佢講話後大家會要求佢再講一次英語。「依家大家對普通話都能講能聽啦，我也要抓緊機會學廣東話！」

區內落實《巴三》易過歐美

劉教授會喺今個星期四至六、中大舉行嘅「巴塞爾三研討班」擔任講者，同非G20成員國嘅中央銀行家交流，同場仲有前金管局總裁任志剛、滙豐銀行亞太區行政總裁王冬勝、永亨銀行（00302）董事長馮鈺斌等，可謂粒粒巨星，唔通佢想學好廣東話，同佢地切磋切磋？

《巴三》嘅各項監管要求今年開始逐步落實，劉明康話呢樣係「脫胎換骨的轉變」，商業銀行將會面對好大壓力，同時要調整發展模式，例如改變公司管治、提升風險管理等。

佢話亞洲區銀行因為經過金融風暴洗禮，抵禦風險嘅能力加強咗好多，要適應《巴三》嘅要求，比起歐美地區銀行相對輕鬆咁話喎。

余詩韻