Market Insight：大昌行受惠日圓跌
就算唔係一代宗師，有番咁上下股齡的，都知股市一係升一係跌，尤其愈唔成熟市場，愈受投資情緒影響。去年第三、四季內地經濟見底，A股唔理，直跌到十二月見三年半低位，但一掉轉行，個半月彈番去2,325點，累計升幅19.3%，同期全球主要市場中排第一。
內地股市的表現，說明這類大上大落市場，有時入市時間比任何因素重要，苦等三年，唔及個半月前入市咁時來運到。回話港股，重磅股中移（00941）漸露疲態，港匯也強勢不再，昨日回到7.7530，接近三個月低位，惟A股狂牛唔願收制，縮窄了港股每次調整幅度，昨日恒指一度跌過百點，收市僅跌31點報23,381點，主板成交750億元是踏入一三年以來最少。
芬佬仲未積極入市
查實港股於一月二日復市狂升655點後，近九個交易日得四百多點上落，睇指數悶死隔離，主要是資金圈住三四五線股炒到不亦樂乎。有趣是，近日美股也有同樣情況，三大指數上落唔大，但細價股組成的Rusell2000指數，卻創下歷史新高，短期股市風險係咪好大，可以參考下美銀美林所做的一項統計。
該行年初搵基金經理作一個統計，發現51%大孖沙表示，短期會在投資組合中增持股票，數字較一二年初足足多近四倍，對環球經濟增長預期，也是一百八十度轉變，59%基金經理預期未來一年環球經濟逐漸好轉，與一年前嘅悲觀睇法實在天與地。
最重要是大多數芬佬把口就話睇好股市，可是綜合基金淨持現金比重，卻仍徘徊在3.8%頗中性水平，證實芬佬個腦同個倉並無一致行動，基金唔夠貨情況，對比去年第四季並無太大改善（當時現金比約4%）。睇形勢，追指數成分股以外落後股份的情況，可能仲會持續多一段時間。
最後補充，基金經理連續四個月增加新興市場投資比重，一月再升40%，年初最睇好的三個股市包括俄羅斯、中國及土耳其，最睇好行業包括內部消費類別，科技及金融股。
日本新任首相安倍晉三，算是今年亞洲股市一大驚喜，不斷重複要求日本擴大量寬措施救經濟，日圓匯價在其指揮棒下跌得誇張，九月時仲係78兌1美元，前日最低跌到落89.67，短短一季貶值一成五，是近年罕見，可以預期貶值潮有利提升日本產品出口競爭力。
有助改善邊際利潤
古勝第一個想法係兩隻化妝品股，可惜日系水貨佔銷售多少未能掌握，反而汽車代理的大昌行（01828），較有信心受惠日圓貶值。皆因其八成收入來自汽車業務，日系車佔當中一半，去年上半年業績麻麻，多少受高圓匯影響，港澳業務營業額升13.4%，邊際利潤因為圓匯高企收窄0.7個百分點，這情況今年應可顯著改善。
財務費用上升，及投資物業重估收益淨額減少等非經營因素拖累，去年六月底止中期賺6.5億元，市場保守估計去年全年賺12.78億元，今年升至14.46億元，相當於10.5倍市盈率，估值吸引。
近日大昌行股價升穿十一月初高位8.21元後，愈升愈有，一月至今，甚至即市從未觸及10日線，強勢畢呈，古勝相信圓匯貶值趨勢已成，如果有機會調整至8.5至8.6元附近，可以開始買第一注。
防守股份鑊氣漸增
大市昨日先跌後升再倒跌，高位市況反覆，唔排除在掩飾大戶喺高位散貨，高追當炒股宜小心。反觀低啤打值板塊呢期好似有番啲資金吸納，如領匯（00823）昨日重上40元樓上收市，報40.55元；置富產業信託（00778）上升0.6%，收報6.54元；港鐵（00066）重上31元後未見太大沽壓，收報31.45元，上升0.4%，春節長假前想搵避險之選，投資者不妨從中入手。
古勝