孖妹S檔案：最強散戶意向普查 百薦博百勝
「你沽咗隻2388（中銀香港）未呀？」「喂，你睇人保（01339）可以升到咩價位？」「哎呀，隻財險（02328）又炒番上嚟，早知就揸多陣啦！」踏入一三年短短半個月，恒指已上升了2.68%，魚缸內七嘴八舌，場內的炒賣氣氛亦回復緊張熾熱，孖妹今年炒股會否有運行？哈，我哋走訪全港九新界證券行，趁着四時收市鐘聲一響，便立刻發動攻勢，搵嚟100位散戶齊齊做問卷調查，實行集思廣益，誓要搵出今年的炒股致勝之道！
彩兒： 依家個個都睇好個市，我哋偶像陸東（Look's Asset Management董事總經理兼投資總監）年頭推算今年恒指嘅合理值有27,800點，搞到我哋心郁郁想入市追貨！
陳小姐：
我只係炒股初哥，好彩近來恒指報捷，今年已有些微斬獲，嘻嘻！希望中美股市都生生性性，咁港股先可以行運到年尾！
黎小姐：
我同樣係初嚟甫到咋！雖然我係炒股新手，但今年恒指將會大漲小回，或可衝上28,000點o架！我會睇準時機入市。
Kiki：
吓，大家都咁樂觀？我就睇得保守少少喇！近排個市升得咁快，實會有調整，依家入市有啲危險喎！近期港股將會甚為波動，市場一旦有壞消息傳出，恒指跌返落19,000點又有咩出奇！我諗住過埋個農曆新年，睇吓港股走勢如何，先再決定會否入市！
高妹： 調查顯示有成96%嘅散戶認為今年係牛市，搞到身邊唔少朋友仔都話要追貨，但究竟要追邊隻好？
張生：
我就睇緊長江生命科技（00775），醫藥股嚟講，升值潛力在於間公司有冇資金研發新產品，咁佢大老闆係李嘉誠，當然有錢研究新藥啦！由於依家係人都驚癌症，佢哋研究癌症藥物，將有好好的發展空間！
彩兒： 我份人好保守o架喎，細價股唔啱我呀！
Steve：
計我話，依家最好炒落後股啦，因近期唔少股份都升咗上嚟，或會有所調整！我哋可轉而留意一些落後股，就好似中信泰富（00267），分分鐘可於短期內炒上16蚊！
Jessica：
普遍而言，市場均睇好中資金融股，但近期已升得太多，加上內地債務仍有問題。相對而言，我較為看好能源股及藥業股，起碼係新興板塊，仲有炒作空間呀嘛！不過，如果你要我揀今年必買的股票，我會揀港交所（00388）。因為今年的大市表現值得憧憬，港交所唔愁冇收入來源！
Clay：
我同樣睇好港交所呀！港股交投漸趨活躍，近日交投每每逾八百億元，加上市傳萬科將啟動B轉H計劃，可進一步刺激大市成交添！
高妹： 不過我近排聽得最多人買嘅股王，非人保（01339）莫屬，皆因估值平，乃內險股中最抵買嘅股份之一呢！
梁小姐：
近來受城鎮化帶動，中資股特別「好炒」，我自己就看重建行（00939）及碧桂園（02007），前者資金及盈利穩健，而碧桂園的銷情理想，兩隻股份都炒得過！
彩兒： 縱使股市有望「重生」，但你覺得今年有咩事會嚇你一驚？
廖小姐：
最驚就梗係美國經濟會否再度衰退啦，嗰邊又印銀紙，政黨意見又不合，有咩風吹草動港股好受影響o架！雖則港人嘅危機處理能力高，但總會因羊群效應唔敢落注！
高妹： 齋買股票好大風險喎，我哋買落咁多蟹貨已經怕怕，真係要避險先得！
鄭生：
依個時勢，最好就係買人民幣，穩打穩紮呀！環球各地央行都印緊銀紙，僅內地政府未有出手，人民幣仍不乏升值空間呀！
若有料報畀高妹同彩兒或有嘢問，可電郵money.biz@opg.com.hk（高妹）（彩兒）