淘寶網購產品無奇不有，由普通嘅服裝、化妝品，到泡椒鳳爪、鼻貼、旅遊套餐，甚至連「保險」同「存款」呢啲金融產品，都一樣可以喺網上面「買」得到。
好似內地嘅光大銀行咁，最近就喺淘寶「聚划算」上推出咗個優惠「團購」，買家只需要用五十蚊人仔嘅入門價，就可以買入呢款叫做「定存寶」嘅產品。
而且買完買完之後，仲會送番等額嘅「集分寶」，畀大家用來喺網上買嘢添。
其實近年內地提倡金融創新，互聯網金融已經開始稍具規模，舊年騰訊控股（00700）、阿里巴巴加埋一家內險公司，就曾經宣布要聯手出資，組建一間互聯網保險金融公司。
而喺上個月，內地中小型保險公司國華人壽通過淘寶網，喺短短三日就賣出咗過億人仔嘅保險產品，亦都再一次顯示出網購嘅強大威力。
今次光大銀行喺淘寶推出呢個「定存寶」產品，最吸引嘅係佢唔單止提供一年3.3厘嘅最優惠利率，仲額外送埋可以直接轉成現金抵扣券，喺淘寶同天貓買嘢嘅「集分寶」。
不過，呢個做法有冇踩到人行嚴禁銀行擅自提高利率，或者用贈送實物等名目變相提高存款利率嘅監管紅線，就真係見仁見智喇。