上周本地券商股國泰君安（01788）停牌，隨後公布了上市後第一次批股集資，接貨者是鼎鼎大名的中國社保基金，以每股2.2元接8,500萬股，比市價大幅折讓17.3%。
意外是市場對消息顯得異常興奮，國泰君安股價一連抽升兩日，或許小股東唔記得兩年前，自己認購價錢比今日社保基金入股價高出95%。
到底今次是小股民叨社保基金光，抑或國泰君安慷小股東之慨，送份厚禮，兩日畀5,300萬社保基金在年底做靚盤數？邢理強搵中期報告睇睇，上半年國泰君安流動資產減流動負債有26億左右，同去年相若，手上現金都有4.2億，咁大壇大龍鳳，集資先得1.87億，難怪管理層亦無在通告中指明大折讓批股所得用途。
近年，社保基金在本地市場沽多買少，國泰君安罕有地獲社保基金寵幸，值得高興，可是，買入規模咁奀，剛剛低過5%買賣需予披露的界線，批股文件也不設有禁售期，社保基金要轉個頭沽貨食胡，可謂神不知鬼不覺。今次接貨，到底有多大誠意支持國泰君安業務，大家亦無謂猜度。社保作風向來進銳退速，作為小股東，都唔知開心定閉翳。
邢理強