尋日係「世界末日」，絲絲相信好多打工仔應該都係喺工作間安全度過啦！咁下星期就係聖誕節，大家開始執定行李未？不過點都唔夠啲大行快，絲絲近日已經收到好幾封「see you in 2013！」嘅「依貓」，話佢哋已經開始放聖誕同新年假喇，真係恨死隔籬！
屈指一算，最早放假嘅莫過於瑞信研究部，佢哋早喺星期二已經宣布放假，而緊接住嘅係德銀，尋日就輪到摩通個研究部都宣布，出年1月3日先至再出報告，所以嚟緊呢兩個禮拜，絲絲想搵佢哋攞份報告睇睇都唔使諗囉！
講開又講，德銀話就話禮拜三開始放假，但原來唔係全體員工齊齊放。外籍分析員要做埋尋日先收爐。只係以馬駿為首、多數係華籍分析員為主嘅部門喺星期三放假先！絲絲在此預祝各位投行老友，大家辛苦咗成年，趁個長假期叉足電，出年再嚟搏殺過！
余詩韻