絲絲講場：雅虎邁耶帶隊鬆一鬆
邁耶（Marissa Mayer）自7月過檔接掌雅虎後，一直搞新意激勵士氣，好似提供免費午餐、送新款智能產品等，員工都不知幾咁歡喜。
邁耶最近仲親自做埋導遊，帶領八十位高層員工跳出辦公室，去到加州半月灣過番個Happy Weekend。嘩，真係驚喜一浪接一浪，絲絲都好想可以去埋一份呀。
近總部唔怕「樂不思蜀」
半月灣位於三藩市同聖何塞兩座城市之間，融合英倫三島嘅傳統風味，而且周圍都可以欣賞到海岸景觀，絕對係夢寐以求嘅度假勝地。雅虎高層喺個咁舒服嘅環境，吹住海風，歎杯靚紅酒，可以舒舒服服抖吓喇。
邁耶識得揀半月灣呢個咁正嘅地方畀員工relax，唔單止證明佢對員工有心，而且半月灣同雅虎嘅三藩市總部唔係相距好遠，咁就唔驚班伙記會玩到唔捨得返公司啦！