微博威力無窮，網民喺上面嘅一句發言，可能引起罵戰，可能引爆消費者對某間公司嘅信任危機，亦都有可能令自己冇咗份工。
最近有個外資航空公司嘅中國籍空姐，就因為喺微博上抱怨公司嘅飛機餐唔好食，而畀公司炒咗魷魚。個問題係佢嘅粉絲又少，更加冇開到公司名，對公司嘅影響可以話係微乎其微，咁樣被炒真係有啲冤枉，難怪連好打不平嘅內地創新工場董事長李開復都要聲援佢。
李開復為人一向正氣，早前試過聯同六十幾個內地企業家一齊聲討沽空機構渾水。佢尋日喺微博公開聲援嗰位空姐，仲話因為呢單事件，令大家都知道原來係呢間公司嘅飛機餐難食喇。絲絲都覺得，其實個空姐冇用實名認證，條微博又冇評論又冇人轉發，連航空公司自己都係查咗成個月先確認到，最後反而因為咁令到條微博出晒名，對嗰間航空公司真係得不償失。
李開復又話，員工喺微博對公司發表抱怨，其實冇唔妥，公司應該研究下，如果抱怨屬實就要反省改善；如果唔屬實，先可以處分員工。