絲絲講場：選百大CEO 「生」不如「死」

話喬布斯係CEO嘅典範相信無乜人會反對，不過佢老人家都仙遊咗超過一年，點解一二年嘅排行榜仲會驚動到佢老人家呢？據主辦機構解釋，今次排名係根據九五年至今收集得嚟嘅數據，統計各位CEO在任期間，為股東帶嚟嘅回報，同埋公司市值增長，所以名單係包括已經離職的前任CEO。

帶領公司市值稱霸

「教主」任職期間，蘋果公司真係如有神助，市值竟然增加咗3,590億美元（約2.8萬億港元），一度榮升全球最大市值企業；但係失去「教主」之後嘅蘋果，近期股價由歷史高位達700美元，大跌至500美元邊緣，講到懷念喬布斯，你同我都未必夠一眾蘋果股東咁深切。

屈居於「教主」之後嘅係網上零售商亞馬遜CEO貝索斯（Jeff Bezos），南韓三星電子前CEO尹鐘龍則獲季軍。

中企舵手 百中有三

兩大智能手機巨頭嘅對決，蘋果藉教主之助總算力壓宿敵。

絲絲仲留意到，百大CEO入面中國企業只得三人入選，排最前就係第17位嘅中航（00753）前董事長李家祥，而中信証券（06030）董事長王東明同格力電器董事長董明珠都有入選，希望出年可以見到榜上有更多中國CEO嘅面孔啦！