中央強調城鎮化係未來工作重點，刺激一眾內房股持續表現強勁。綠城中國（03900）股價年初至今升咗3倍，同時市場預計明年內地樓市銷售穩定，樓價仍會上升。咁嘅憧憬下，Prof. J認為綠城估值未算貴。
綠城以前嘅高負債比率限制咗佢增長前景，但自今年六月先後有九倉（00004）注資，並向融創中國（01918）賣出部分項目權益組成合營公司之後，集團嘅財政狀況已大大改善。差唔多合作咗半年就有初步成果：頭11個月銷售金額已超過今年400億元人民幣嘅銷售目標。雙方喺互補嘅前提下「合作」，呢個營運模式確係堅！
之前綠城着力喺維持高資產周轉率，但同時又堅持佢嘅產品要有高質素，搞到高槓桿、低利潤率。但依家融創主導項目銷售之後，業務策略調整咗，以高端市場為重點。綠城管理層指，未來會減少高端樓盤嘅比例，增加主流樓盤供應，此舉令新嘅可供銷售面積上升，提高利潤率。呢招「拆細」，多啲嚟密啲手，將有助提高資金回籠速度。長線睇，當綠城嘅現金流壓力減輕後，再推番啲高質素樓盤，Prof. J相信到時可以重拾定價能力。
Prof. J大膽假設兩間集團嘅和諧合作將會繼續，依家綠城一三年預測市盈率仲係6至7倍，加上股價相對資產淨值有一定折讓，可憧憬機構投資者為集團重新估值。不過，Prof. J溫馨提示，內房股仍需留意政策風險，尤其係打壓樓市嘅力度。繼續追蹤，出發！
香港大學電子金融服務榮譽助理教授 徐燦傑