絲絲講場：內地富二代回饋公益
香港有個由富豪後代組成嘅百仁基金會，原來內地都有個由企業家二代組成嘅「接力中國青年精英協會」，會員包括新希望集團董事長劉永好嘅女劉暢、四通集團董事長段永基嘅仔段劉文、湯臣副主席湯子嘉、三一重工梁穩根嘅仔梁治中等等。
講起「富二代」，好多人都會即時聯想到「二世祖」、「不思進取」呢啲負面詞彙，身為呢個富二代精英組織理事長嘅段劉文，就覺得「富二代」個字眼其實好中性，人哋要點演繹好難去控制，最重要都係做好自己。
好似接力中國咁，接近二百個會員，全部都經過精挑細選，質量絕對有保證，過去呢幾年從未有會員涉及負面新聞，就證明唔可以一竹篙打一船人。
會員移民必被踢走
段劉文話，內地嘅富二代，其實係三十年改革開放先富起來嘅一班人，今次同上海宋慶齡基金會等，喺香港發起「中國心」公益專項基金，就係大家想回饋社會，希望可以用自己嘅能力幫國家做啲嘢。佢話自己當年喺外國讀書時，已經好為「中國人」嘅身份而自豪，依家協會所有會員都有一顆「中國心」，如果有人搞移民，一定踢佢出會冇情講。
余詩韻